美國南方雅典、鄉村音樂之都－田納西州納士維 Nashville, Tennessee

旅程既第一站，由 Urbana Illinois 開車去田納西州既納士維 Nashville, Tennessee。納士維被譽為美國南方既雅典，亦都係美國既鄉村音樂之都。因為順路既關係，我地會經過呢個城市參觀一日半。

我地全程行 Interstate Highways，行 Interstate 57 South 轉 Interstate 24 East，經過肯塔基州 Keuntucky，响 Kentucky 食個個 KFC，用兩個半鐘就到 Nashville。Tennessee 既道路保養比 Illinois 好，因為唔會落雪。

開高速公路入城，Nashville 既外觀同普通美國中型城市無咩分別，市中心都有好多棟高樓大廈，高速公路發達，但往往入到市中心就好荒蕪，好多爛地停車場，車比人多幾十倍。呢個城市特別突出既地方，係過馬路提示比盲人既聲，係啲金絲雀叫既聲黎，所以响市區開住窗開車，會聽到好多金絲雀叫，好正。

我地夜晚睇 Opry and Ryman 既表演，下晝兩點鐘到到市中心，所以我地响市中心搵咗個 All Day Parking，再响市中心週圍用腳行下。

通常美國既州府都會有個 XXX State Museum，我地都入咗去睇。呢個 State Museum 主要都係講呢個州啲城既歷史，原住民，同美國內戰既重要性。相同既嘢其實都睇過好多次 haha 美國啲博物館其實個個州都不斷複製……

响隔離就係田納西州州議會同埋議會廣場。個廣場同美國好多城市一樣，又係啲二戰紀念碑…美國內戰紀念碑…韓戰紀念碑…越戰紀念碑…都係咁重覆。而田納西州州議會就特別喇，佢係採用 Greek Revivial 既建築風格興建，好似雅典既巴特農神殿，所以點解呢個城叫南方既雅典。我地可以行上去州議會望，可以望到成個納士維既風景。

再沿住所謂最旺既街（下低張相係一個人都無 lol），去到市政廣場。呢個廣場空無一人，但係係全城既中央廣場，响河邊，可以飽覽市中心既景色。

發出金絲雀聲既機器。

AT&T Tower 就係納士維最出名既高樓大廈。

然後我地去睇 Opry and Ryman 既表演，個表演唔錯，只不過好貴，要 $60 US，未連稅。現代既鄉村音樂同古舊既鄉村音樂差好遠，我鐘意舊嗰啲多啲，但新既都唔錯。

第二朝我地去咗最出名既鄉村音樂街 Broadway。呢條街好多特色餐廳，可以聽到好多鄉村音樂。食物唔好多期望，都係漢堡包薯條，大約都要七八蚊美金。

然後我地去咗 Cumberland River 既一個堡疊，叫 Fort Nashborough。呢個堡疊係當年美國內戰既其中一個重要城堡，啲軍人以前就係响個咁簡陃既地方瞓覺，為咗美國人既自由作戰。

最後去咗州議會前面既公園參觀。呢個公園係納士維既中央公園，有好多關於呢個州既裝飾品，例如成個田納西州既縣地圖。另外，呢個公園亦都有全美國最大既農產品市場，你可以响到買到最新鮮運到黎既蔬果，同鮮榨飲品食物。呢個公園最特別係個公園上面有條火車軌，有時會聽到啲舊式既砵砵聲，好懷舊。

離開納士維，就繼續向南進發，下一個城市 Chattanooga, Tennessee。